गुल्मी
छत्रकोट गाउँपालिकाको कार्यालय गुल्मीमा कपडा बैंक सञ्चालन हुने भएको छ।छत्रकोट गाउँपालिकाको कार्यालय र क्लोथ एण्ड फुड बैंक नेपाल बीच कपडा बैंक सञ्चालन गर्ने सम्बन्धी सम्झौता भएको छ। छत्रकोट गाउँपालिकाअध्यक्ष रामप्रसाद पाण्डेले देशैभरि सञ्चालन गर्न लागिएको यो कार्यक्रमले हाम्रो घर समाज र टोल सफा गर्नुको साथै आवश्यक व्यक्तिहरुलाई कपडा प्रदान गर्नु मानवीय कार्य हुने विश्वास व्यक्त गर्दै उहाँले मानव सेवाको लागि प्रयोगमा नआएका कपडाहरुलाई पुन प्रयोग भन्ने मूल नाराका साथ सुरु हुने यो अभियानले समग्र गाउँ बासी लगायत देशकै हित हुने विश्वास व्यक्त गर्नुभएको छ। उहाँले हाल गाउँपालिकाको कार्यालयमा कपडा बैंकको कपडा सङ्कलन बक्स राखिने र आगामी आर्थिक वर्षमा पनि थप बक्स समेत सञ्चालन गरिने योजना रहेको भन्दै गाउँवासीलाई पुरानो लत्ता कपडा ,झोला, ब्याग, बेल्ट, तथा दैनिक प्रयोगजन्य सामग्री जम्मा गरी आ – आफ्नो घर टोल समाज सफा पनि हुने र पुण्यको कार्य पनि हुने हुँदा यो कार्यमा सहभागीताका लागि अनुरोध समेत गर्नुभयो ।
प्रयोगमा नआएका कपडा सङ्कलन गरेर पुनःप्रशोधन ( रि -साइकल ) गरी आवश्यकताका आधारमा निःशुल्क वितरण गरिने यो कार्यक्रममा जोडिन पाउँदा निकै खुसी लागेको उहाँले बताउनुभयो । क्लोथ एण्ड फुड बैक नेपाल लुम्बिनी प्रदेश संयोजक सुष्मा गौतमले देशका साथै प्रदेशमा यो अभियान सञ्चालन भइरहेको र देशका स्थानीय सरकार तथा विभिन्न संघसंस्थालाई यो अभियानमा सहकार्य गर्न आह्वान समेत गर्नुभयो। मानव सेवाको लागि प्रयोगमा नआएका कपडालाई पुन :प्रयोग भन्ने मूल नाराका साथ नितान्त मानवीय सेवा भावले स्थापना गरिएको बैंकबाट अधिकतम सेवा लिन सकिने उहाँले बताउनुभयो। क्लोथ एण्ड फूड बैंक नेपालका परिकल्पनाकार तथा संस्थापक अध्यक्ष कमल जिसीले क्लोथ एन्ड फुड बैंक नेपालले आगामी दुई वर्षमा देशलाई कपडामुक्त बनाउने र र २०८२ सम्ममा देशैभर फुड एम्बुलेन्स समेत सञ्चालन गर्ने योजना बनाएको बताउनुभयो।
Be the first to comment